ვაზის გაშენება
ვაზის დარგვა შეიძლება ჩატარდეს როგორც შემოდგომით, ისე გაზაფხულზე. უპირატესობა აქვს შემოდგომაზე დარგულ ვაზს. საშემოდგომო დარგვა წარმოებს შემოდგომა-ზამთრის განმავლობაში, თბილ დღეებში, გაუყინავ ნიადაგში. გაზაფხულზე ვაზი უნდა დაირგას რაც შეიძლება ადრე (10 აპრილამდე). ვაზი უნდა დაირგას 40-50 სმ. სიღრმისა და 30 სმ. სიგანის ორმოში, რომლის სიღრმე 8-10 სანტიმეტრით უნდა აღემატებოდეს ვაზის სიგრძეს. თითოეული ორმოსათვის საჭიროა 5-6 კგ. დამწვარი ნაკელი, რომელსაც ურევენ ფხვიერ მიწაში.
დარგვის წინ ნამყენს აცლიან დაზიანებულ ფესვებს, ძირითად ფესვებს კი ამოკლებენ 10-15 სმ-მდე. ორმოს ავსებენ ნაკელშერეული ფხვიერი მიწით, კარგად ტკეპნიან და თავზე უკეთებენ ფხვიერი მიწის კოკოლას, რომლის სიმაღლე შემოდგომაზე დარგვისას 10-12 სმ, ხოლო გაზაფხულზე დარგვისა 6-8 სმ. უნდა იყოს. ვაზი ისე უნდა დაირგას, რომმყნობის ადგილი 2-3 სანტიმეტრით იყოს დაშორებული ნიადაგის ზედაპირიდან.
ვაზი უნდა დაირგას 1.5 x 1.5 მ. კვების არეზე, შეიძლება 1.5 x 1.25 ან 1.25 x 1.25 მეტრზე. სუფრის ჯიშებისთვის კვების არე შეიძლება იყოს 2.1 x 2.0 ან 2.5 x 2.0 მეტრზე.
| 
